بدون حجاب . خالد عزالدين
يا جون مانوووو
ياخي قلبوا كيانا . قلبوا حياتنا . شالو نومنا وشالوا نعاسانا وما بنقول حليلهم .. شردونا وعذبونا وكتلوا اهلنا. بكونا شالوا الفرحة والسهله والمهلة وادونا البلكونه . سواد في سواد وكأن اسم السودان قد اخذ معناه الان من هذا السواد كلو ليل اسود وشالوا محمد الامين وسمعونا القونه . دانه وراء دانه وكل يوم معانا والخرطوم بقت محل الناس ما بتنوم ويا حليل امدرمان فقدت الامان والبره عايشين بقوا يخافوا يردوا علي التلفون كلوا اخبار موت الحمد لله الذي يبدل الاشياء ويعطيك شئ من الفرح من حيث لا تحتسب وانت بتعاين في المحترفين منتظر واحد فلته جاي من مازيمبي ولا واحد اسمو كلود جان يبقي جان ولا سنغالي زي ساديو ماني يجيك الفرح من جون مانو قدرة الله كده زول انت قنعان من خيرا فيهو لاعب طويل يدخل يتلفت ما تفهم علاقتو شنو بالكوره لا مهارة ولا جساره ولا تمرير ولا تهديف تستغرب العاجب فلوران فيهو شنو .الله يا جون مانو . الله يا جون مانو. هل نقول ظلمناك كما ظلمنا وطنا . هل نقول ما عندنا صبر عشان كده ربنا اختبرنا . هل نقول نزلت عليك ليلة القدر .. من أين لكل بكل هذا وعملتها كيف .. ياخي الولد ده لما كان بسخن انا سخنت في عز برد امريكا زهجت وقلقت وهذه هي حقيقة كرة القدم جون مانو لم يقدم اي حاجة تشفع ليهو لكن فلوران الصبور شاف حاجة فيهو الولد ده نزل المرة دي وقال لينا جاااكم تعالوا اتفرجو تعالو استمتعو عايزين الجسارة. الباك ده لو اتقدم اسالوني. عايزين الرجاله انا بتسدا ليكم العملوا فيكم خالد بدره زمان. عايزين المهارة اووب شفت دي يا خالد. شفت دي يا طارق وطارق ذياب ده زعلان مني عشان ما قدر يلعب باص زي اللعبتو انا ده. ياخي طارق ذياب قال الترجي غالب بفرح انصاروا ومغلوب بفرح الناس هوووي يا انت كان كده داقس وما لاقي اليصحيك ترجي شنو وبرنجي شنو نحن فرحانين عشان الهلال غلب انت ما بتعرف الهلال ولا شنو لو انت من باب سويقه نحن من سوق القش ولو انت من تونس نحن من السودان من امدرمان قال فرحانين عشان غلبنا الترجي نحن فرحانين عشان هلالنا الما شايفين اكبر منو ولا اعظم منو ولا اجمل منو انا متاكد لو تمريرة جون مانو دي لعبها واحد من الترجي كان الاستديو اتحول كلو الي تحليل التمريرة وكان عملتو لينا حصه في مهارات اللاعب التونسي وكان ضربتو مليون مثل بمليون لاعب قديم لكن المسكين ده ما جبتو سيرتو الاستديو كلو بتكلم عن هزيمة الترجي حتي هيثم مصطفي كان مهذب اكثر من اللازم ياخي ديل لو الهلال جا فيهو قوون بقولوا ليك دفاع ساذج الكورة السودانية ما بتعرف تدافع واللاعبين السودانيين ما بعرفوا يقيفو لما محمد عبد الرحمن فتح شوارع باب سويقه وابوابها قالوا ليك ثنائي الدفاع ما كان في يومو طيب ادونا فرصة ياخي جون مانو ده كان في يومو ان شاء الله ما تنومو ازعلوا ازعلوا ازعلو لو كان الترجي يا طارق ذياب بفرٌح طيب نحن بنزعل. عليك الله امشي احضر الاستديو ده تاني وشوف وشك كان عامل كيف ياخي انت مربع ادينك ما قدرت تفكها تقول قدامك استاذ رياضيات وفعلا يا جون مانو كنت استاذ حقيقة من نزلت الكورة دي اتغيرت في لاعب هنا عندو مهارة استثنائيه لاعب من الاحتياطي دخل بهدوء غريب ونشاط غريب وشراسة غريبة في نفس الوقت. لاعب بثلاثة لاعبين. مدافع شرس ومهاجم خطر وصانع العاب يا الله يا الله تمريرة لمحمد عبد الرحمن بعد كسرة كده كسرة ضلعة في طارق ذياب وتمريرة لبابي عبدو خلت باب سويقه كلها بره فجأة الولد لقي روحوا منفرد وصراحة هو جراي جري الهلال بقي زي الموردة زمان طيارات ما تعرفها بتجيك من وين ربنا يكفينا شر الطيران اليومين دي .
أستديوا تحليلي كلوا بحلل المباراة من باب هزيمة الترجي وهيثم مصطفي بكل تهذيب ما جاب سيرة الترجي اتلكم عن الهلال بس وعن مهارة لاعبيه وعن مدرب الهلال ما جاب سيرة لدفاع الترجي الساذج ولا جهل اللاعبين بابجديات كرة القدم في التغطية ويجيك واحد زي طارق ذياب ده يقول ليك نحن اللي اديناهم الماتش احنا اللي سهلنا مهمتهم احنا اللي خليناهم يلعبوا كورة تقول نحن شغالين معاهم. الترجي ده من غير مساعدة حكام زيو وزي اي فريق ومن غير مساعدة الدولة ما بكون فريق دوله عشان كده لما قلنا الحكم سي ما سئ استبشرنا خير علي الاقل لو غلبونا يغلبونا بمجهودهم وطلع ما عندهم مجهود مافي يومهم زي ما قال طارق ذياب طيب نحن ما قاعدين برضوا نكون مافي يومنا لييه بتقولوا علينا سذج وما بنعرف نقيف في الدفاع ليه كده يا طارق يا زعلان والزعلان كلموا يقع الخزان كلموا والخزان زاتو زي الترجي ضربوا الله وسو يا سو ترجي ضربوا والله ضربه برشا برشا والكوره دي فيها برشا غريبة عملها ياسر مزمل في الحارس مميش ومعليش معليش يا مميش ويا مميش امان الله نحن ما عندنا اعتراض علي امان الله لكن ما عندنا ليك امان وربنا ما اراد ليك الامان مع اولاد امدرمان .. ياخي نحن فرحانين عشان طولنا ما فرحنا الترجي ده نحن لعبنا معاه في مجموعة واحده صعدنا قبل المباراة معاهو لعبنا معاهو مباراة ودية في دوري الابطال في تونس نتيجتها ما فارقه معانا زي زعلك ده . انت لو زعلان انا ما بزعل وانت لو فرحان نحن بالاكتر شوفت جمهور تنزانيا ده فرحان كبير فرحة من القلب عشق من القلب ياخي ده الهلال عندو سحرو بارهو ده كده الناس بتحبوا وبتفرح بيهو قال فرحنين عشان غلبناهم طيب التنزانيين ديل فرحانيين لي شنو ديل فرحانيين عشان الهلال غلب لو غلب الشباب التنزاني زاتو بكونو فرحانيين يا زعلان ..
باختصار جون مانو قدم دقائق لو شالها صورها في فيديو ووداها لناس ليفربول طوالي بسجلوا وبكبتوا جون ماني يعود من جديد اقصد ساديو ماني يا جون ماني والله امس كنت احرف منو ..
قال نحن بنفرح . طيب نحن بنزعل .. موت بمغصتك انت والمعاك . غياظ يا جون مانو