فلوران ود خيتي ست الجيل .. خارج الميدان

أخونا العزيز الصحفي المخضرم عبد المنعم شجرابي رجل يعرف قدر نفسه وهو في الاصل صادق مع الاخرين ونفسه لذلك يختار عناوين صادقة ومعبرة لاعمدته المختلفة .. هو يكتب الان تحت عنوان اضرب واهرب وهو فعلا يضرب ويهرب بهدوء فلا تعرف من الذي ضربك او تحس بالوجع دون ان يكون لديك رغبة في الانتقام لان قلم شجرابي حساس ولديه قدرة خاصة في استعمال الكي دون ان يكوي وقبل ان يتحول شجرابي للضرب والهروب وهو الهارب الان من جحيم الحرب الي مصر مدينة نصر كان يكتب من خارج الميدان وهو يعرف قدر نفسه جيدا فلا قبل له ولا معرفة بضرب الكرة ولكنه معلم في الفرجة والكتابة من خارج الميدان وهذا تخصصه وليس بامر غريب عليه ولكنني تذكرت شجرابي وانا اقرا ما قاله فلوران مدرب الهلال للاعلام عقب هزيمة فريقنا من بترواتلتيكو وشعرت بان المتحدث هو شجرابي وليس فلوران لان الحديث كله كان خارج الميدان .. فلوران مثل شجرابي حدثنا عن الحرب وعن نفسيات اللاعبين السودانيين وعن الاحلام والامنيات وعن الشجن الاليم وعن التسجيلات وعن المعسكرات وعن الجسد والروح في امدرمان وكاد ان يكتب لنا عن ود خيتي ست الجيل وخالتي بت احمد وزي ما بقول شجرابي الزول ده مالوا بره الموضوع الزول ده سايقنا بالخلا وما عارف الخلا اصلا خطير وخصوصا اليومين ديل .. يا فلوران ود خيتي ست الجيل حدثنا عن طريقة لعبك وعن دفاعك المشكوف في عمقه وقداموا ثلاثة ارتكازات تقول نحن ناقصين ارتكازات .. ويا فلوران ود خيتي ست الجيل السودانيين التعبانيين من سفر الجفا وحريق البلد خليهم واحكي لينا عن الاجانب الما عندهم علاقة بالسودان البلادهم في امان ودولاراتهم في البنوك مالهم ديل يا ود خيتي ست الجيل الحاصل عليهم شنو تدًخل واحد وتطلع واحد وكلو واحد وشبهم واحد لا فرقنا بوسو من ميشو ولا بابي من جوثان حاصل علينا شنو يا فلوران يا ود خيتي ست الجيل مالو الهلال بقي كده ونحن ختيناهو امانة في ذمتك وسافرنا .. قلت داير القروش اديناك قلت داير المعسكرات سوينا ليك قلت داير التذاكر سافرنا بالواطه واللواري وقطعنا ليك بالطيارات يا ود خيتي ست الجيل نحاول نفتش ليك في العذر وما لاقين .. التسجيلات موسمين والخانات بقت اربعين والخزنة الوحيدة المفتوحة في البلد خزنة الهلال مالك يا ود خيتي ست الجيل دفاعك مكشوف زي حال بلدنا ومشتت حالو مالك اي كورة معكوسة زي صوت المدافع تخلي دفاعك مخلوع وتائه مالك يا ود خيتي ست الجيل هجومك طاشي زي الدانات محل ما تقع تقع يشوتو ساي ويلعبوا ساي لا شفنا خطة لا شفنا فكرة لا شفنا تعاون انت اولادك ديل بفكروا في الحرب ولا متحاربين هم زاتهم في نفسهم
يا فلوران ود خيتي ست الجيل الصبر كمل والناس بقت تتكلم فيك عديل شهر العسل خلاص انتهي وانت لسه كل يوم بلاعب وكل يوم بقصة .. جمهور الهلال كان بحبك كان بدافع عنك اعلام الهلال كان صابر عليك شعب الهلال كلوا اداك فرصتك وانت جاي تتكلم عن الاعذار وقلق اللاعبين ونحن ما طالبين غير كورة في الواطة باص وخانة وحركة وخفة واجتهاد ياخي الاهلي شال دوري الابطال في بلد فيها حالة طوارئ ومافيها دوري وكلها مشاكل نحن بس عايزين نشوف كورة حلوة ولا خلاص انكتب علينا المر في كل شئ